الأحلام زي الشجر لازم يكون لها جدور في الأرض تحميها وتقويها من أي شوية هوا أو ريح عاتية عايزة توقعها.. وزي ما الشجر ألوان وأنواع مختلفة وكثيرة ومنها اللي بيطرح فاكهة ترد الروح كمان فيه أحلام كتيرة قوي نفسها تطرح خير وعلم ونور وتحاول تنور حياة الناس.. أصل الأحلام زي القلوب وكل قلبك ما كان بيحب الناس حلمك كمان هايبقي زيك.. "مي مجدي" حلمها شبهها بالضبط.. يعني لما هاتشوفها هاتحس بطاقة منتشرة في المكان وهاتعرف إنها طاقة خير ونور من احساسك بأنها بنت مصرية جدا متواضعة وعايشة حياتها بمنتهي البساطة وأصحابها كتير جدا في كل حتة وكل مكان هتلاقي حد يعرفها ويحكي عنها.
حلم "مي" مرتبط بالشاشة الصغيرة أو بمعني تاني مرتبط ب "الميديا" الوسيلة العالمية اللي قصرت علي الدنيا مسافات كتيرة ودخلت الكون كله قد البيانولا مليان صور ومعلومات وتواصل بين البشر.. "مي" باختصار مشروع اعلامية مصرية مذهلة هاتتفاجيء لما تعرف إنها المسئولة المباشرة عن معظم انتاج قناة "OTV" من البرامج الحوارية و التسجيلية والوثائقية وغيرها.
"مي" هي المنتج الفني لبرنامج مساءك سكر زيادة. اللي أصبح واحداً من أهم البرامج الحوارية في الفضائيات العربية وحلمها كل يوم بيكبر علشان تساهم في انتاج كل المواد اللي تنور الناس وتعرفهم وتفهمهم وتعبر عنهم وتزودهم بالمعرفة وتديهم الفرصة كمان للتواصل.
مشوار "مي" لسه بيبدأ وقريب قوي هاتبقي اسم من دهب في دنيا المعرفة التليفزيونية الشهيرة بكلمة "ميديا".
|
