من الحياة
السيد البابلي
sayedelbably@hotmail.com
يا رايحين للنبي الغالي هنيالكم وعقبالي...
فيه أغنية مابيبقاش شهر رمضان هو رمضان من غيرها.. وهي أغنية محمد عبدالمطلب بتاعة رمضان جانا.. أهلا رمضان..
وزيها فيه أغنية أول ما نسمعها نعرف أن موسم الحج بدأ والعيد الكبير علي الأبواب وهي أغنية الست ليلي مراد يا رايحين للنبي الغالي هنيالكم وعقبالي..
ويا سلام كمان لما العظيمة أم كلثوم بتغني دعا لي لبيته لحد باب بيته وأما تجلالي بالدمع ناجيته..
وإيه ده يا جماعة دا إحنا عندنا حاجات روحانية تخلي الحجر يحس. وتخلي العاصي يتوب.. وتخلينا حلوين قوي قوي مع بعض بدون غيرة ولا حقد ولا حسد ولا كلمة ليه واشمعني.. وكل واحد ياكل بس في الطبق اللي قدامه وبلاش يبص لطبق اللي جنبه... فهي دي القناعة اللي لما ضاعت ضاع الخير والناس بقت طماعة. ومادام عرفت سكة الطمع يبقي فيه نصب وغش وقتل..
وما علينا نرجع لموضوع الحج أحسن مليان بركة. ودي أيام كلها بركة ومن بركاتها كمان أن الحكومة بتاعتنا اللي طول عمرها بتقول هات هاتقول خد وهاتدينا أسهم مجانية في شركات علشان نبيعها ونكسب... وأموت وأعرف دا حلم ولا علم.. وليه الحكومة نزل عليها كل الكرم ده دلوقت.. واحنا عملنا إيه أو مطلوب منا نعمل إيه علشان ده كله.. ويا رب جيب العواقب سليمة.. قولوا آمين.
وفي موضوعنا بتاع الحج بنقول ربنا يكتبها لكل أمة محمد عليه الصلاة والسلام ويروحوا يزروا النبي الغالي ويصلوا في المسجد الحرام ويطوفوا بالكعبة ويشوفوا اللي احنا شفناه هناك.. شوفنا نور.. كنا طايرين فوق السحاب.. كنا بندعي في نهاية الحج أن ربنا يتوفانا هناك واحنا طاهرين متطهرين من ذنوبنا وبقينا صفحة بيضا ونقية وهو فيه أحلي ولا أروع من إنك تقابل ربك وصفحتك بيضا ورايتك بيضا.. وملابسك بيضا..
وفيه ناس شفناها جاية للحج من دول ناس كتير ماسمعتش عنها. والناس دول من يوم ما بيتولدوا وهم بيحوشوا ويجهزوا نفسهم للحج.. ودي أمنية كل واحد فيهم وحلمه في الحياه.. والناس دي لما بتيجي الحج بتحس أن الواحد فيهم في عينيه نور وفي قلبه نور وأمامه نور.. الناس دي بتحج بصحيح وعارفه يعني إيه الحج..
وبنشوف ناس بيحجوا في الحج الفاخر السريع بتاع إوعي تنسي الويسكي وأنت خارج من المطار يا حاج.. ودول الواحد فيهم مابيخرجشي من الفندق الخمس نجوم وبيدلع نفسه علي الآخر وراح الحج بدل المرة عشرة.. والحاج راح.. الجاح جه.. وكفاية عليه بس لما يرجع يقولوا الجاح رجع بالسلامة..
ودول لازم يفهموا أن الحج فريضة. وانها مرة واحدة بس في العمر.. وبعد كدة بتبقي تطوع..
ويا ريت كمان يفهموا أن الفلوس الكتير قوي اللي يبسافروا بيها كل سنة في الحج السوبر بتاع الباشوات أفضل لو صرفها علي مشروعات للغلابة وحاربوا بيها الجوع اللي بينخر في المجتمع زي السوس..
ويا ريتهم يسألوا في الموضوع ده المشايخ بتوعنا الكبار ويسألوهم.. إيه الأفضل يسافروا كل سنة للحج ولا يسفروا ناس غلابة عمرها ما حجت وإيه الأفضل كمان يسافروا كل سنة ولا يصرفوا الفلوس دي علي المستشفيات والمشروعات اللي بتخدم المحتاج وتأكل الجعان..
والحكاية والله مش عاوزه سؤال.. ولا عاوزه فتوي.. دا المثل بيقول اللي يعوزه بيتك يتحرم علي الجامع.. يعني يا أولاد الحلال بيتك محتاج.. افهموها بقي بيتك محتاج.. الناس تعبانة. وفيه ناس كتير جعانة.. يعني خدوا بالكم من اخوانكم.. خدوا بالكم من جيرانكم.. وربنا يتقبل منا ومنكم.. ويكون العيد الحقيقي في مكة وفي الميدان.. وفي كل مكان فيه مسلمين هنا وهناك..
** ملحوظة أخيرة:
أنا شفت صور ملكة جمال مصر وهي بتحضر القرعة بتاع بطولة القارات..
وبصراحة كده.. مفيش فرق كبير بينها وبين زكية زكريا....!
