من الحياة
بقلـم : السيد البابلي
sayedelbably@hotmail.com
وساكته ليه يا حكومة...!
الحكاية بقت بايخه ومكرره وبدل المره ميه. وإذا استمرت يبقي عليه العوض ومنه العوض في النهاردة وبكره واللي جاي بعد عشرين سنه..!
فحكايتنا ان كل اللي عاوز حاجة يروح يجمع كام واحد فاضي من اللي قاعدين طول اليوم علي القهاوي ويقطع بيهم الطريق أو يحط كام شجرة علي شريط القطار ويوقف حركة القطارات ويقعد علي كرسي مستني الحكومة تيجي لغاية عنده وتقوله بلاش كده عيب .. يرد يقول لأ .. لينا مطالب .. يقولوله اتدلل ياحبة عين الحكومة والنظام كله .. . ومن غير دلال .. كلامك كله أوامر .. هوه إحنا موجودين ليه .. إحنا إتولدنا علشان نخدمك ونسعدك ..!
ومادام الحكاية كده .. ومفيش حد بيقول لأ .. والحق مش دايما عند عبد الحق يبقي نجرب ونطلع إحنا كمان في مظاهرة .. ونقطع السكة ونطلع الراجل الكبير بتاعنا ..!
والراجل الكبير بتاع مين وفين؟
الراجل الكبير يبقي تاجر الصنف .. بتاع المزاج كله .. بتاع الليلة عيد . واللي عايش في محافظة الشرقية . والي فيها من غير زعل الأصناف المعتبرة ..!
والمهم .. الراجل ده إعتقلوه .. في السجن ورموه ... وقدامه بدل القضية عشرة .. والتهمة ثابته ثابته .. والمحكمة بقي هي اللي تقول ..!
لكن محكمه إيه .. وقانون إيه .. ده كان زمان .. دلوقتي فيه قانون جديد إحنا اللي بنقرره واللي نقول عليه هو اللي يمشي .. دي شرعية الشارع أعلي من شريعة المحاكم .. واللي مش عاجبه يورينا عرض أكتافه ..
وإلي الأمام يا روميل .. إلي الشارع .. وشارع إيه .. إلي الطريق الصحراوي علي طول .. طريق القاهرة - بلبيس الصحراوي .. وبالتحديد عند ميدان الطيارة .. ويا للا يا جماعة مفيش حد يعدي من هنا .. يا إحنا يا همه .. والراجل بتاعنا يطلع .. يعني يطلع وان ما طلعش يبقي الإعتصام مستمر .. والأكل موجود والشرب موجود .. والخيام موجودة .. وكل واحد نفسه في حاجة ها يلا قيها .. ودقي يا مزيكا ورقصني ياجدع ..!
واللي بيحصل ده مش فيلم ولا رواية .. دي ناس مش عاجبها ان الدولة تعتقل واحد بيتاجر في المخدرات .. وليه وليه يعتقلوه .. عمل إيه يعني ؟ وإيه جريمته..!
واللي عملوه بقطع الطريق بيعمله غيرهم في كل مكان .. وإحنا مش عارفين أخرتها كده إيه .. ونهايتها إزاي ... ويعني إيه ناس تقطع الطريق وتحدف طوب علي إللي رايح واللي جاي .. وبأمارة إيه ان واحد جاهل بلطجي يحط شجرة علي قضبان السكة الحديد ويعطل حركة القطارات يوم .. يومين .. لغاية ما يشبع من الطبطبه والدلع وبعدين يقول .. خلاص علشان خاطركم نفتح الطريق ونشيل الشجرة .. واتفضلي شاي يا حكومة .. ما تيجوا .. انتم ما بتجوش ليه ..!
وساكته ليه يا حكومة .. مانعرفش .. انت فين يا بوليس .. الله أعلم .. والقانون راح فين .. إسألوا عليه إنتم .. وشوفوا إيه حكايته..
واللي الناس دي بتعمله هو اللي بيهدم الثورة .. هوه اللي يخلي بعض الناس تترحم علي زمان .. وهو اللي ها يخلي ناس تانيه تقول فين أيام الكرباج..!
وياناس .. يا شعبنا الحلو .. عاوزين نطلع خطوة لقدام بدل ما نرجع عشرين خطوة لورا وعلشان نطلع قدام لازم نحمي الثورة .. نحميها ازاي .. بالسلوك والقانون .. مش بإن كل واحد يعمل اللي عاوزه..
ويعمل اللي عاوزه إزاي .. يعني مقطورة تمشي في الطريق السريع عكس الإتجاه . وطبيب يدهس ضابط مرور حاول يمنعه في الإتجاه العكسي. وسواقين ميكروباصات عملوا مطالع الكباري مواقف ليهم .. وسواقين توك توك بيلفوا في شوارع مصر الجديدة والزمالك .. وأسواق عشوائية بتتوجد بين يوم وليلة في مدينة نصر وفي المعادي .. وشارع فيصل يبقي جمهورية مستقلة يسيطر عليها بلطجية من تخصص تأديب السكان .. وإحتجاجات فئوية من كل لون وشكل وكل مؤسسة ومصلحة فيها ثورة.. وكله عاوز يشيل كله .. وكله طمعان في مكان كله .. وكله عاوز وبس ومفيش حد بيقول يجيبوا له منين وإزاي ..!
وكل دا بيحصل وحزب الكنبه بيتفرج .. وكمان بقي مشغول في الدوري ورجعت ريما لعادتها القديمة .. وشيكابالا رجع يرقص مع إنه من يوم ما رقص والدوري بعد عن ميت عقبه ... والجماعة بتوع الكوره رجعوا يشتغلوا .. ويحللوا.. والشاذلي جاب صبغة جديدة وكأنه إبن العشرين .. وكله بيلعب. ماهي دي مرحلة اللعب .. واللي تغلب به إلعب به ما هو مولد وصاحبه غايب .. ولو مش مولد .. ما كنش الناس وقفت وهتفت .. سيبوه .. طلعوه .. هو عمل إيه ده بتاع حشيش وبس..!!
ملحوطة آخيرة:
كله بأمره...
