السلام عليكم ورحمة الله وبركاته.. الرحلة السنوية لأوائل الثانوية تبدأ بكرة إن شاء الله.. حد عايز حاجة من ألمانيا أو فرنسا أجيبهالو معايا؟!.. عموماً الخميس الجاي 21/8 واللي بعده 28/8 الركن الهادي حيقفل.. والصفحة حتبقي كلها "مع الجماهير".. وإن شاء الله وعليكو خير الخميس 4/9 نتقابل في الركن.. بس ساعتها حنبقي صايمين.. باي.
û ليه الركن الأيام دي بيظهر في نص المساحة بس؟! محمود عزام كلية آداب طنطا.
** المحرر: عشان بنغطي النص التحتاني بإعلانات.. أحسن عيب.
û تلاقيك نسيتني.. أنا عائشة عبدالصبور.. ليسانس آداب إنجليزي من الزقازيق.. حبيت أسلم عليك بس وأقولك أنا خلاص اتخرجت وبقيت فاضية.
** المحرر: يعني أتقدم..؟!
û طلب مدفوع في باب "أريد عريساً" في جريدة "الجمهورية".. سيدة تجاوزت الخمسين عاماً لديها شقة مؤثثة علي النيل ودخل كبير لوظيفة محترمة.. تريد الزواج من رجل محترم سنه فوق الستين.. تفتكر الشروط دي تنطبق علي مين؟! فتحي محمد أبو بكر الخطاره قنا.
** المحرر: علي "هريدي" ولد عمي.
û أي فنانة يسألها صحفي عن رأيها في أدوار الإغراء إذا عرضت عليها. يكون ردها: أنا ضد الإغراء غير الهادف.. طب إيه هوه الإغراء الهادف؟! أحمد خيري محمود سوهاج.
** المحرر: اللي يفتح لها طريق الشهرة.
û من سوهاج. كتب حمادة عجور يقول: في أقصر حوار. سأل مأمور الضرايب موظفاً: بتدفع كام ضريبة دخل؟! رد الموظف باستغراب: يعني إيه دخل؟!
** المحرر: وانت دخلك إيه؟!
û للقضاء علي "تسرب" أسئلة الامتحانات مستقبلاً.. أقترح دمج وزارة التعليم بوزارة البترول. خالد ضيف علي محامي بطنطا.
** المحرر: عايزها تولع.
û كان المشير "عبدالحكيم عامر" رحمة الله عليه رئيساً لنادي الزمالك وأيضاً شقيقه المهندس "حسن عامر" كان رئيساً لنادي الزمالك ومؤخراً تم تعيين مجلس مؤقت يضم أيضاً د. "محمد عامر" أعتقد أنها بشري خير للفنانة "وفاء عامر"..!!
مجدي محمد أبو سالم سرس الليان منوفية
** المحرر: هي كمان أبيض بخطين حمر؟!
û في برنامج اسمه "لحظات حقيقة" يذاع علي "أو بي سي" يسأل المذيع المتسابق في وجود زوجة "المتسابق" وأفراد أسرته: هل قمت بخيانة زوجتك؟! وهل في بعض الأوقات تشك بها؟! وغيرها من الأسئلة اللي تخرب البيت والمفروض أن المتسابق يجاوب بكل صدق وفي المقابل يحصل علي مبلغ من المال.
وأنا أسأل: هاتنفعه الفلوس بعد ما يكون خسر زوجته وعيلته؟! أميرة صلاح متولي قليوبية.
** المحرر: بالمناسبة مرة لعيب كورة سأل مراته في جلسة صفا بعد اعتزاله: يا تري خنتيني طول ما انت معايا؟! قالت له: ثلاث مرات بس يا حبيبي.. لكن والله كلهم كانوا لمصلحتك.. فاكر لما المدرب كان موش مقتنع بيك ودايماً راكنك علي دكة الاحتياطي.. موش فجأة بقي ينزلك أساسي في كل ماتش؟! دي أول مرة.
قال لها: طب والثانية؟! قالت له: فاكر لما كنت تنزل الملعب.. كل لعيبة الفريق يقاطعوك ومحدش يباصيلك ولا كورة.. موش فجأة بقوا يدولك كل الكور قدام الجون لحد ما بقيت هداف الفرقة؟!
قال لها: طب والثالثة؟!
قالت له: فاكر لما ال 70 ألف متفرج كانوا كل ما تنزل الملعب يصفروا...........؟!
ردود خاصة.. إلي:
** إيمان فرحات جابر سمسطا بني سويف: مبروك ليسانس الحقوق.. بجد برافو عليكي.
** وليد عثمان سليمان طهطا سوهاج: موضوع تجريف الأرض الزراعية لإنتاج الطوب.. قديم وسبق الكتابة فيه مليون مرة.
** ياسر أبو الفتوح توفيق سوهاجي مقيم في استراليا: يا ابني انت رايح استراليا ومتغرب عشان تكتب لنا عن قانون المرور في مصر؟! متقول لنا قانون المرور في استراليا بيعمل إيه.
** نورهان محمد نور الدين القاهرة: ربنا موجود.. وحقوق الضحايا لازم ترجع لهم.
|
